O‘z kuchingni angla.

O‘z kuchingni angla: David Gogginsdan Qat’iyat va O‘sish Haqida Saboqlar

Devid Goggins - bu ism qat’iyat va ruhiy bardoshlilik bilan bir qatorda keladi, deb aytsak mubolag‘a bo‘lmaydi. O‘zining ajoyib chidamliligi va o‘zini takomillashtirishdagi tinimsiz izlanishlari bilan tanilgan Goggins, ichki kuch qudrati va shaxsiy rivojlanishning o‘zgaruvchan yo‘li haqida qimmatli fikrlar beradi. Ushbu maqolada, neyrobiolog Endryu Huberman bilan uning suhbatidan asosiy saboqlarni va ularning iroda kuchi va chidamlilik ilmi bilan qanday bog‘liq ekanligini o‘rganib chiqamiz.

Chidamlilikning Asl Manbai: Ichki Iroda

Goggins haqiqiy kuchni tashqi olamdan emas, balki ichki dunyodan izlash kerakligini tez-tez ta’kidlaydi. Uning fikricha, haqiqiy kuch bu ichki irodaning manbai bo‘lib, u o‘zini qiyinchiliklarga qarshi turishga undaydi. Jismoniy, aqliy yoki ruhiy qiyinchiliklar, Gogginsning fikricha, o‘ziga bo‘lgan ishonchni mustahkamlashning kalitidir. Goggins uchun haqiqiy motivatsiya boshqalardan kelmaydi; aksincha, bu motivatsiya qiyinchiliklarga qarshi turish va ularni yengib o‘tish istagi orqali paydo bo‘ladi.

Ushbu jarayonda miyaning o‘ziga xos bir qismi katta rol o‘ynaydi. Old medial singulyar korteksi, iroda bilan bog‘liq bo‘lgan miya qismi, qancha ko‘p qiyinchiliklarga duch kelsa, shuncha rivojlanadi va chidamli bo‘laveradi. Qiyin vaziyatlarga duch kelish va komfort zonasidan chiqish, chuqurroq bardoshlilikni rivojlantiradi; bu jarayon takroriy amaliyot va qat’iy harakatlar orqali shakllanadi.

Sukunatda Qilingan Mehnat

Devid Gogginsning ommaviy qiyofasi orqasida ko‘zga ko‘rinmas ulkan mehnat yotadi. Uning fikricha, uning muvaffaqiyat sababi boshqalar tomonidan berilgan e’tirofda emas, balki boshqalar ko‘rmagan soatlab yolg‘izlikda qilgan mashaqqatli mehnat natijasi deb biladi. Haqiqiy xarakter hech kimning e’tiboriga tushmay, hech kimning maqtoviga muhtoj bo‘lmasdan yolg‘iz mehnat qilganda charxlanadi. Shu lahzalarda haqiqiy o‘zgarish sodir bo‘ladi, chunki chidamlilik va qat’iy sukunatda shakllanadi. 

Bu g‘oya "ko‘rinmas mehnat" tushunchasi bilan bog‘liq: yolg‘izlikda o‘tkazilgan jismoniy mashq soatlari, to‘xtovsiz aqliy tayyorgarlik, va qiyinchiliklarga tik turishga tayyor bo‘lish orqaligina yechiladigan sirli mashaqqatlar. Biz ushbu lahzalarni qabul qilganimizda, mukofotning haqiqiy qiymati e’tirofda emas, balki chuqur shaxsiy o‘sishda ekanligini tushunishni boshlaymiz.

Qiyinchiliklar Orqali Rivojlanish: Iroda Kuchi

Iroda, Gogginsning ta’kidlashicha, kuchli mushak singari bo‘lib, uni muntazam ravishda mashq qildirish zarur. Agar bu "mushak" e’tiborsiz qoldirilsa, u zaiflashadi va yangi qiyinchiliklarga dosh bera olmay qoladi. Jismoniy mashqlar mushaklarni kuchaytirganidek, ruhiy chidamlilikni oshirish va uni saqlab qolish ham doimiy sa’y-harakatlarni talab qiladi. Haqiqiy o‘sish qiyinchiliklar va og‘riq orqali keladi — bu, bizni sindiradigan og‘riq emas, bu bizni o‘ylaganimizdan ham ko‘proq kuchga ega ekanligimizni anglatadigan og‘riq. Aynan shunday  miyaning old singulat korteksini rivojlantirishga yordam beradi, ya’ni har bir sinov bilan aqlimiz yanada kuchaytiriladi.

Bu konsepsiya nafaqat sportchilar uchun, balki hayotda to‘siqlarga duch keladigan har bir kishi uchun ham muhimdir. Karyerada muvaffaqiyat qozonish, munosabatlarni yaxshilash yoki shaxsiy qo‘rquvlarni yengib o‘tish bo‘lsin, iroda va chidamlilik qiyin vazifalarga sarflangan sa’y-harakatlar orqali o‘sadi—biz esa ko‘pincha ulardan qochishga harakat qilamiz.

Samimiy Muloqot va Shaxsiy O‘sish

Gogginsning Huberman bilan suhbatidan olingan muhim tushunchalardan biri samimiy muloqotning ahamiyati. Gogginsning fikricha, eng yaqinlarimiz bilan o‘z maqsadlarimiz va qiyinchiliklarimiz haqida ochiq muloqot qilish boshqalarga bizning hayot yo‘limizni tushunishga yordam beradi va shaxsiy o‘sishimizni qo‘llab-quvvatlaydigan muhit yaratadi. 

Shuni yodda tutingki, tanlagan yo‘lingizni hamma ham tushunmasligi yoki qo‘llab-quvvatlamasligi mumkin. Bu normal holat. Eng muhimi, o‘zimizga sodiq qolish, intizomimizni saqlash, shu bilan birga biz uchun muhim bo‘lgan odamlarga g‘amxo‘rlik qilishdir. Aslida, samimiy suhbatlar qurish va yaqinlarimizni qo‘llab-quvvatlash  bizning shaxsiy chegaralarimizni saqlab qolishga yordam berishi mumkin, bu esa uzoq muddatli chidamlilik uchun muhim bo‘lgan muvozanatni ta’minlaydi.

Maqsad va O'zligingiz

Biz aslida kim ekanligimizni, shu jumladan, o‘tmishda duch kelgan kurashlarimizni anglash va qabul qilish ichki mamnunlik uchun juda muhimdir. Bizning kimligimiz faqatgina muvaffaqiyatlarimiz yoki muvaffaqiyatsizliklarimiz bilan belgilanmaydi; u yo‘limizda duch kelgan qiyinchiliklarga qanday munosabatda bo‘lishimiz bilan shakllanadi. Gogginsning bosib o‘tgan yo‘li biz o‘ylaganimizdan ancha ko‘proq imkoniyatlarga ega ekanligimizni va biz haqiqiy kuchimizni qo‘rquvlarimiz bilan yuzlashganimizda topishimizni isbotlaydi.

Bu yo‘l oson emas. Bu yo‘l o‘z qo‘rquv va xatolarimizga to‘g‘ridan-to‘g‘ri qarab, noqulaylikka qaramay, harakat qilishni tanlashni talab qiladi. O‘sish o‘zimizni komfort zonasidan chiqarishga, qo‘rquvlarimizga duch kelishga va ularni yengish uchun kerakli ishni bajarishga majbur qilganimizda sodir bo‘ladi.

Xulosa: Barqarorlikka erishish

Devid Gogginsning so‘zlaridan o‘rganishimiz mumkin bo‘lgan narsa shundaki, haqiqiy kuchimiz ichimizda yashiringan va bu kuch faqat qiyinchiliklarni yengish va qat’iyatli bo‘lish orqali uyg‘onadi. Shaxs sifatida o‘sishimiz uchun noqulaylikka tayyor bo‘lishimiz, yolg‘izlikni qabul qilishimiz va o‘zimiz bilan ham, boshqalar bilan ham ochiq va samimiy muloqotda bo‘lishimiz kerak. Faqat qiyinchiliklarni to‘g‘ridan-to‘g‘ri qabul qilgan holda biz qat’iyat va chidamlilikka erisha olamiz. Bu yo‘ldan borar ekanmiz, duch kelayotgan kurashlarimiz aslida to‘siq emas, balki xarakterimizni shakllantirish, ichki kuchimizni rivojlantirish va haqiqiy salohiyatimizni kashf etish imkoniyatlari ekanligini tushunib yetamiz.

Haqiqiy chidamlilik bu hech qachon sinmaslik emas, balki bizni sindira oladigan qiyinchiliklarga tik turish va ular orqali yanada kuchliroq bo‘lishdan iborat. Goggins ta’kidlaganidek, bu yo‘l doimo ichimizdan boshlanadi.

Tarjimon: Marjan Maxkamova

Muharrir: Tillayev Asadbek

"Miya Ilmi" bo'limi. lideri: Jamshidbek Tillayev

Manba:https://youtu.be/nDLb8_wgX50?si=fiDO0zTRJH5Z_Bwk